Author Archive Maamul

Wasiirka waxbarashada XFS oo sheegay in la dhisayo guddiga tacliinta sare ee dalka

Wasiirka waxbarashada hiddaha iyo tacliinta sare  ee xukuumadda federaalka Soomaaliya Cabdulahi Goodax Barre ayaa sheegay in wasaaradda ay wado qorshe lagu dhisayo  guddiga tacliinta sare ee dalka.

Cabdulahi Goodax Barre ayaa sheegay in guddigan ay dib u habeyn ku sameyn doonaan tayada waxbarashada jaamacaddaha dalka, si loo ogaado tayadooda.

“Wasaaradda waxbarashada waxay qorsheyneysa in la sameeyo guddiga tacliinta sare ee dalka si dib u habeyn loogu sameeyo waxbarashada jaamacadaha dalka, islamarkana loo ogaado tayadooda”ayuu yiri wasiirka waxbarashada Soomaaliya Cabdulahi Goodax Barre oo ka qeyb galayay barnaamijka kulanka todobaadka ee warbaahinta dowladda.

Wasiirka waxbarashada dalka Cabdulahi Goodax Barre ayaa tilmaamay in sannadka 2020-ka ay ku rajo weyn yihiin in jaamacadda Ummadda ay  awood u yeelato in sannad kasta ay qaato 10.000 kun oo ardey.

Wasaaradda waxbarashada xukuumadda federaalka Soomaaliya ayaa dhawaan la soo wareegtay 24 iskuul oo ku yaalla gobolka Banaadir kuwaasoo hadda si lacag la’aan ay  wax uga bartan ardey Soomaaliyeed.

Sidoo kale wasaaradda waxbarashada  Soomaaliya ayaa diyaarisay islamarkana qeybisay manhajka cusub ee fasalada koowaad ilaa afaraad.

Wasiirka waxbarashada Mudane Cabdulahi Goodax Barre oo la kulmay guddiga tacliinta sare ee Turkiga

Wasiirka waxbarashada hiddaha iyo tacliinta sare ee xukuumadda federaalka Soomaaliya Mudane Cabdulahi Goodax Barre ayaa maagalada Ankara ee dalka Turkiga kulan kula qaatay guddiga tacliinta saree Turkiga.

Kulanka ayaa looga hadlay horumarinta waxbarashada, iyo siddii guddiga tacliinta sare ee Turkiga ay kaalin uga geysan lahayeen tababarida macalimiinta Soomaaliyeed.

Danjiraha Soomaaliya u jooga dalka Turkiga Jaamac Cabdullahi Maxamed Caydiid iyo  u qaybsanaha  waxbarashada ee safaaradda  Cabdicasiis Cabdiraxmaan Xasan ayaa goob joog ka ahaa kulanka.

Wasiirka waxbarashada xukuumadda federaalka Soomaaliya Mudane Cabdulahi Goodax Barre ayaa tilmaamay in guddiga ay ka wada hadleen siddii ay door muhiim ah uga qaadan lahayeen horumarinta waxbarashada dalka iyo tababarka macalimiinta.

“Magaalada Ankara ee dalka Turkiga waxaan kulan kula qaatay  guddiga tacliinta sare  ee dalka Turkiga, waxaan  ka wada hadalnay arrimo ay ka mid yihiin horumarinta waxbarashada.,sidoo kale waxaan ka wada hadalnay siddii guddoonka YOK ay door muhiim ah uga qaadan lahayeen  tababarida  macalimiinta dugsiyada  sare ,dugsiga sare ee farsamada gacanta , korantada ,xanaanada xoolaha ,beeraha iyo  kaluumaysiga”ayuu yiri wasiirka waxbarashada Mudane Cabdulahi Goodax Barre.

Wasiirka wasaaradda waxbarashada hiddaha iyo tacliinta Sare Mudane Cabdulahi Goodax Barre  ayaa sheegay in wasaaradda  ay  dadaal ugu  jirto siddii kor loogu qaadi lahaa tayada waxbarashada dalka.

Wasiirka waxbarashada Soomaaliya Mudane Cabdulahi Goodax Barre oo shir uga qeyb galay dalka Morocco

Wasiirka wasaaradda waxbarshada hiddaha iyo tacliinta sare ee xukuumadda federaalka  Soomaaliya Mudane Cabdulaahi Goodax Bare ayaa magaaladda Rabat ee dalka Morocco ka qeyb galay shir ay iskugu yimaadeen wasiirada waxbarashada dalalka ku jira  hay’adda Islamic Educational Scientific and Cultural Organization (ISESCO).

Kulankan ayaa looga hadlay sidii wasiirada waxbarashada dalalkan ay iskaga kaashan lahayeen arrimaha waxbarashada.

Wasiirka  waxbarashada xukuumadda federaalka Soomaaliya  Mudane Cabdulahi Goodax Barre ayaa sheegay in wasiirada uu kulanka la qaatay uu  kala hadlay sidii  door muhiim ah uga qaadan lahayeen horumarinta waxbarashada Soomaaliya.

“Dhamaan wasiirada waxbarashada dalalka ku jira hay,adda Islaamic Educational scientific and Cultural Organization [ISESCO]  waxaan ka wada hadalnay sidii kaalin mug leh uga qaadan lahayeen horumarinta waxbarashada Soomaaliya, waana isku afgarnay “ayuu yiri wasiirada waxbarashada Soomaaliya  Mudane Cabdulahi Goodax Barre.

Wasaaradda waxbarashada  dalka ayaa dhawaan ku guuleystay inay hirgeliso manhajka cusub ee wasaaradda ay soo diyaarisay iyadoo loo qeybiyay iskuulladii dhawaan ay la soo wareegtay wasaaradda waxbarashada Soomaaliya.

Mudane  Cabdulahi Goodax Barre wasiirka waxbarashada Soomaaliya ayaa dadaal ugu jira sidii loo horumarin lahaa waxbarashada dalka.

Magaalada Muqdisho ayaa lagu qabtay kulan looga hadlayo sida loo horumarin karo barashada xirfadda farsamada gacanta.

Wasiir ku xigeenka wasaaradda waxbarashada hiddaha iyo tacliinta sare ee xukuumadda federaalka Feysal Cumar Guuleed, xubno ka tirsan dowladda, aqoonyahanno, iyo madax ka tirsan hay’adda Niis ayaa ka qeyb galay kulankan.

Qaasim Gaabow Ducaale oo ah wakiilka hay’adda Niis ee Soomaaliya ayaa tilmaamay in hadafka laga leeyahay kulankan uu yahay sidii looga shaqeyn lahaa in bulshada laga horumarinayo dhinacyada nolosha iyo wax soo saarka si isku filnaasho loo gaaro.

Maxamed Cadde Mukhtaar oo ka tirsan wasaaradda shaqada iyo arrimaha bulshada xukuumadda federaalka Soomaaliya ayaa ballan qaaday inay ka shaqeyn doonaan sidii shaqo abuur loogu sameyn lahaa dhalinyaradda Soomaaliyeed.

“Waxaan ku dadaali doonnaa sidii shaqo abuur loogu sameyn lahaa dhalinyaradda Soomaaliyeed ee wax baratay, si looga gudbo dhibaatooyinka dhanka nolosha ah ee soo wajaha dhalinyarada” ayuu yiri Maxamed Cadde Mukhtaar.

Wasiir ku xigeenka wasaaradda waxbarashada xukuumadda federaalka Soomaaliya Feysal Cumar Guuleed ayaa sheegay in ka wasaarad ahaan ay ka go’an tahay sidii loo horumarin lahaa barashada farsamooyinka gacanta.

“Ka wasaarad ahaan waxaa naga go’an inaan horumarinno, waxbarashada bulshada, gaar ahaan, farsamooyinka gacanta, si fursada shaqo ay u helan dhalinyaradda” ayuu yiri wasiir ku xigeenka waxbarashada Feysal Cumar Guuleed.

Wasaaradda waxbarashada xukuumadda federaalka Soomaaliya ayaa qorsheyneysa in dhamaadka sannadkan ay qabato shir weyne looga hadlayo siyaasadda guud ee barnaamijka farsamada gacanta.

 

Wasaaradda Waxbarashada oo sagootisay dhalinyaro deeq waxbarasho ka heley Itoobiya+sawirro

Munaasabada lagu sagootinayay 20 dhalinyaro ah oo ka kala socday ha,adaha dowladda qeybahoda ,deeqaha wax barasho ka helay dalka itoobiya ee aan dariska nahay,waxaa ka qeyb galay masuuliyiin ka socatay wasaaradda waxbarshada Hiddaha iyo tacliinta sare ee Soomaaliya iyo
Danjiraha dowladda Itobiya u fadhiya Soomaaliya Jamaalo diin Mustafa,iyo marti sharaf kale oo lagu casumay.

Lataliyaha tacliinta sare ee wasaaradda waxbarashada ismaaciil yuusuf Cismaan ayaa dar daaran u jeediyaya ardayda deeqaha waxbarsho kahelay dalka itobiya in ay ku dadaalaan hamigooda ah in ay waxbartaan.

Danjiraha dowladda itoobiya u fadhiya Soomaaliya Jamaalo diin Mustafa ayaa kahadlay xariirka ka dhaxeya Soomaaliya iyo itoobiya,
waxaa barnaamijkan barbar socda sanadkasta minxada waxbarasho ee aan siino Soomaaliya,Bartamaha iyo Koonfurta Soomaaliya sanadkan 190 ayaa siinay todobaadkan ayuu dhamaandoonaa”. Ayuu yiri Danjire Jamaaludiin Mustafa.

Wasiiru doowlaha wasaaradda waxbarshada Hiddaha iyo tacliinta sare C/raxmaan Maxamuud Cabdulle Jaabir ayaa ugu mahad celiyay Dowladda itoobiya iyo shacabka itoobiya soo dhaweynta ay markasta la garab taaganyihiin dhalinyarta Soomaaliyeed,

Muhiimadda aan ka leenahay in aan hormarino dhalinyarteena waa midda kaliya ee aan u noolnahay taabo kasta ee aan waan u qaadeynaa dhanka waxbarshada waa ,waajib naga saran in dadkeena ay wax bartaan, marka waxaan rajeynaynaa in ardayda kale ay ka imaan doonaan dowlad goboleedyada.

Wasaaradda waxbarashadda Hidddaha iyo tacliinta sare ee Soomaaliya ayaa wadda dar dar galinta hormarinta waxbarshadda dalka,

RW kheyre oo maanta iskuulka Jabuuti ka qeybiyay bugaagta manhajka cusub.

Ra’iisul wasaaraha xukuummadda Federaalka Soomaaliya Mudane Xasan Cali Khayre ayaa maanta kormeer ku tagay iskuulka Jabuuti oo ka mid ah iskuulladii dhawaan ay la soo wareegtay wasaaradda waxbarashada xukuumadda federaalka Soomaaliya.
Kormeerkan ayaa waxaa ra’iisul wasaaraha Soomaaliya ku wehelinayay wasiiru dowlaha wasaaradda waxbarashada Cabdiraxmaan Maxamuud Cabdulle iyo xubno kale oo ka tirsan dowladda.
Ra’iisul wasaaraha Soomaaliya ayaa ardeyda iskuulka u qeybiyay bugaagta ay ku qoran yihiin manhajka cusub ee ay diyaarisay wasaaradda waxbarashada.
Xassan Cali Kheyre ayaa sheegay in dowladda federaalka ay ka go’an tahay horumarinta waxbarashada dalka.
“Dowladda federaalka waxaa ka go’an inay horumariso waxbarashada dalka waxaan idin ku dhiiri gelinaya inaad wax bartan”ayuu yiri ra’iisul wasaaraha Soomaaliya Xassan Cali Kheyre.
Wasaaradda waxbarashada hiddaha iyo tacliinta sare ee xukuumadda federaalka Soomaaliya ayaa dhawaan bilowday bixinta bugaagta manhajka cusub, iyadoo maanta la soo gaba gabeeyay.

 

 

Wasaaradda waxbarashada oo bugaagta manhajka cusub u qeybisay Iskuullada dowladda

Wasiirka xigeenka wasaaradda waxbarashada hiddaha iyo tacliinta saree e xukuumadda Soomaaliya Feysal Cumar Guuleed ayaa maanta iskuullada dowladda u qeybiyay buugaagta manhajka ee dhawaan ay diyaarisay wasaaradda waxbarashada Soomaaliya.
Iskuulladan oo ku yaalla gobolka Banaadir islamarkana ah dugsiyadii dhawaan dowladda ay la soo wareegtay ayaa mid mid u galay fasallada isagoo ardeydda u qeybiyay bugaagta cusub.
Agaasimaha waaxda dugsiyadda wasaaradda waxbarshada Soomaaliya Muuse Maxamed Caraale ayaa bogaadiyay manhajka waxbarashada dalka isagoo kula dardaarmay walidiinta inay ka shaqeeyan sidii loo kobcin lahaa garaadka caruurtooda.
Wasiir ku xigeenka wasaaradda waxbarashada Mudane Feysal Cumar Guuleed ayaa sheegay in iskuullada ay la soo wareegta dowladda intooda badan loo qeybiyay manhajkan cusub.
“Maanta waxaa nasiib u yeeshay in iskuulladii dhawaan la soo wareegtay wasaaradda waxbarashada hiddaha iyo tacliinta sare in u qeybiyo bugaagtii ay wax ku baran lahayeen, intooda badan waa la soo qeybiyay”ayuu yiri wasiir ku xigeenka wasaaradda waxbarashada Feysal Cumar Guuleed.
Wasiir ku xigeenka wasaaradda waxbarashada Mudane Feysal Cumar Guuleed ayaa tilmaamay in wasaaradda waxbarashada ay la soo wareeji doonto dhammaan iskuullada ay leedahay dowladda, islamarkana loo dhameystirayo manhajka waxbarshadda dalka.
“ Bulshada Soomaaliyeed waxaan u sheegaya in maanta ay lee yihiin manhaj mideysan oo wax lagu barayo ardaydda Soomaaliyeed”ayuu yiri Mudane Feysal Cumar Guuleed.
Wasaaradda waxbarashada xukuumadda federaalka Soomaaliya ayaa dhawaan ku guuleystay inay la soo wareegto 24 iskuul oo ku yaalla gobolka Banaadir.

 

 

 

 

Wasiirka waxbarashada XFS oo kulan sagootin ah u sameeyay danjirihii hore ee Suudaan u fadhiyay Soomaaliya

Wasiirka wasaaradda waxbarashada hiddaha iyo tacliinta sare ee xukuumadda federaalka Soomaaliya Mudane Cabdulahi Goodax Barre ayaa maanta kulan sagootin ah u sameeyay danjirihii dowladda Suudaan u fadhiyay Soomaaliya Maxamed Yuusuf Ibraahim.

Kulanka ayaa lagu lafa guray xoojinta xiriirka ka dhexeeya labada dal, iyo  iskaashiga dhanka waxbarashada, waxana kulanka goob joog ka ahaa xoghayaha joogtada ee wasaaradda waxbarashada Mudane Axmed Yuusuf Xassan iyo xubno kale oo ka tirsan wasaaradda.

Wasiirka waxbarashada xukuumadda federaalka Soomaaliya Mudane Cabdulahi Goodax Barre ayaa dowladda Suudaan uga mahad celiyay sida markasta ay u garab tagan yahay shacabka iyo dowladda Soomaaliya, gaar ahaan dhanka waxbarashada.

“Maanta waxaan kulan sagootin ah ugu sameeyay  danjirihii hore ee dowladda Suudaan u fadhiyay Soomaaliya  Ambasador. Maxamed Yuusuf Ibraahim, waxaan ka wada hadalnay, xoojinta xiriirka ka dhexeeya labada dalka, dowladda Suudaan waxay ka mid tahay dalalka deeqaha waxbarasho siiya dalkeenna, hadda waxaa jaamacadaha Suudaan wax ka dhigta ardey badan oo Soomaaliyeed”ayuu yiri wasiirka waxbarashada Soomaaliya Mudane Cabdulahi Goodax Barre.

Mudane Cabdulahi Goodax Barre ayaa guul u rajeyay danjirihii hore ee Suudaan u fadhiyay Soomaaliya Maxamed Yuusuf Ibraahim, isagoo bogaadiyay hawshii uu dalka ka qabtay mudadii uu joogay.

Ambasador Maxamed Yuusuf Ibraahim ayaa dowladda Soomaaliya ku amaanay horumarka ay ku talaabsatay mudadii ay jirtay isagoo ballan qaaday in dowladda Suudaan ay kordhin doonto deeqaha waxbarasho ee ay siiso Soomaaliya.

“Waxaan bogaadinaya dadaalka dowladda federaalka Soomaaliya iyo horumarka ay ku talaabsatay mudadii ay jirtay, waxaan u mahad celinaya madaxda dowladda federaalka iyo kuwa wasaaradda waxbarashada, oo si wanaagsan aan u soo wada shaqeynay”ayuu yiri danjirihii hore ee Suudaan u fadhiyay Soomaaliya.

Wasiirka waxbarashada xukuumadda federaalka Soomaaliya Mudane Cabdulahi Goodax Barre ayaa shahaado sharaf guddoonsiyay danjirihii hore ee dowladda Suudaan u fadhiyay Soomaaliya Maxamed Yuusuf Ibraahim.

Wasaaradda waxbarashada Soomaaliya ayaa maalintii shalay ku guuleystay inay la soo wareegto 24 iskuul  oo ku yaalla gobolka Banaadir.

Wasaaradda waxbarashada XFS oo la soo wareegta 24 iskuul;

Munaasabad ku saabsan ololaha dib u soo nooleynta waxbarashada dadweynaha ayaa maanta lagu qabtay magaalada Muqdisho iyadoo  Wasaaradda waxbarashada hidaha iyo tacliinta sare ee xukuumadda federaalka Soomaaliya ayaa  kula wareegtay 24  iskuul oo ku yaalla gobolka Banaadir.

Munaasabaddan ayaa waxaa ka qeyb galay madaxweynaha jamhuuriyadda federaalka Soomaaliya Mudane Maxamed Cabdulahi Farmaajo, wasiirka waxbarashada Mudane Cabdulahi Goodax Barre, Wasiir ku xigeenka wasaaradda waxbarshada feysal cumar guuleed,wasiiru dowlaha wasaaradda waxbarashada Cabdiraxman Maxamuud Cabdulle, agaasimaha guud ee wasaaradda waxbarashada  Xassan Maxamed Cali, xubno ka socda bahda waxbarashada, iyo marti sharaf kale.

Wasiirka waxbarashada xukuumadda federaalka Soomaaliya Mudane Cabdulahi Goodax Barre ayaa sheegay in maanta wasaaradda ay ku guuleystay inay la soo wareegto 24 iskuul oo ku yaalla gobolka Banaadir islamarkana maanta wixii ka dambeeya wasaaradda ay qaadeyso masuuliyadooda.

“Maanta waxaan ku guuleysanay inaan la soo wareegno 24 iskuul oo ku yalla gobolka Banaadir, maanta wixi ka dambeeya, waxaa masuuliyadooda qaadeysa wasaaradda waxbarashada hidaha iyo tacliinta sare ee xukuumadda federaalka Soomaaliya.

Mudane Cabdulahi Goodax Barre ayaa  tilmaamay in marna aan la iloobi doonin doorkii dalladaha waxbarashada ay ka soo qaateen intii lagu guda jiray bur burka horumarinta waxbarashada.

Iskuullada maanta wasaaradda waxbarashada xukuumadda federaalka ay la wareegay ayaa kala ah Kaaraan, Godey, Cabdi casiis, Gaashaanle, 11 janaayo, Bartamaha, Wiil waal, Bartanaha, Yaasiin cismaan, Agoonta Boondheere, Maxamuud mire, Hanti wadaag, Howlawadaag, Xasan khaliidi, Cali xuseen, Jabuuti, Deyniile, Maxamuud Hilowle, Axmed waayeel, Ex aqoon darsed, 21 November, 20 December, Agoonta wiilasha kaaran, Macalin jaamac.

Madaxweynaha jamhuuriyadda federaalka Soomaaliya Mudane Cabdulahi Farmaajo ayaa sheegay in dowladiisa ay ahmiyada koowaad siineyso horumarinta waxbarashada.

“Ahmiyadda koowaad waxaa noo ah horumarinta waxbarashada, manhajka waxbarashada waa in lagu soo dara wadaniyadda, iyo muhiimada uu lee yahay qofka “ayuu yiri madaxweynaha Soomaaliya Maxamed Cabdulahi Farmaajo.

Madaxweynaha Jamhuuriyadda federaalka Soomaaliya Mudane Maxamed Cabdulahi Farmaajo iyo wasiirka waxbarashada Mudane Cabdulahi Goodax Barre ayaa ardeyda ku sugneyd munaasabada guddoonsiyay  Bugaag ay ku qoran yihiin manhajka cusub ee wasaaradda waxbarashada ay diyaarisay.

 

 

 

 

 

Wasiirka waxbarashada XFS oo hogaanka dalladaha waxbarashada kala hadlay Hirgelinta manhajka cusub

Wasiirka waxbarashada hidaha iyo tacliinta sare ee xukuumadda federaalka Soomaaliya Mudane Cabdulahi Goodax Barre ayaa maanta xafiiskiisa magaalada Muqdisho ku qaabilay hogaanka dalladaha waxbarashada dalka.

Kulanka ayaa looga hadlay, hirgelinta manhajka cusub ee ay diyaarisay wasaaradda waxbarashada dalka, xoojinta wada shaqeynta ka dhaxeysa wasaaradda iyo dalladaha waxbarashada.

Agaasimaha guud wasaaradda waxbarashada Mudane Xassan Maxamed Cali, iyo xoghayaha joogtada ah ee wasaaradda Mudane Axmed Yuusuf Xassan, ayaa kulanka goob joog ka ahaa.

Xubnaha ka socday dalladaha waxbarashada dalka ayaa bogaadiyay dadaalka wasaaradda waxbarashada ugu jirto sidii loo horumarin lahaa waxbarashada.

Wasiirka wasaaradda waxbarashada hidaha iyo tacliinta sare ee Soomaaliya Mudane Cabdulahi Goodax Barre ayaa sheegay in hogaanka dalladaha ay ka wada hadleen sidii manhajka cusub ee wasaaradda soo diyaarisay loo gaarsiin lahaa iskuullada dalka,

“Maanta waxaan xafiiskeyga ku qaabilay, hogaanka dalladaha waxbarashada dalka , arrimaha ugu muhiimsan ee aan ka wada hadalnay waxaa ka mid ah hirgelinta manhajka cusub ee wasaaradda waxbarashada ay diyaarisay”ayuu yiri wasiirka waxbarashada xukuumadda federaalka Soomaaliya Cabdulahi Goodax Barre.

Mudane Cabdulahi Goodax Barre ayaa hogaanka dalladaha waxbarashada dalka uga mahad celiyay, sidii ay ugu soo dhabar adeygeen horumarinta waxbarashada dalka intii lagu guda jiray burburka.

Wasaaradda waxbarashada xukuumadda federaalka Soomaaliya ayaa malmaha soo socda qorsheyneysa inay la soo wareegto 25 iskuul oo ku yaalla gobolka Banaadir kuwaasoo si lacag la’aan ah ay wax uga baran doonaan caruurta Soomaaliyeed.