Wararka

Wasiirka waxbarashada XFS oo ku dhawaaqay xiliga uu dhacayo imtixaanka qaranka iyo amar uu soo saaray

Wasiirka waxbarashadda hiddaha iyo tacliinta sare ee xukuumadda federaalka Soomaaliya Mudane Cabdulahi Goodax Barre oo maanta shir jaraa’iid ku qabtay xafiiskiisa ayaa jaamacaddaha dalka ku amray in aysan qaadan Karin ardey aan ka qeyb galin imtixaanka guud ee qaranka.

 

“Maanta laga bilaabo wasaaradda waxbarashada hiddaha iyo tacliinta sare ee xukuumadda federaalka Soomaaliya  waxay go’aan ku gaartay islamarkana jaamacaddaha dalka ka mamnuucday  inaysan qaadan Karin ardey aan soo marin imtixaanka qaran ee dalka, waana ku kormeeri doona dhammaan jaamacaddaha”ayuu yiri wasiirka waxbarashadda Mudane Cabdulahi Goodax Barre.

 

Mudane Cabdulahi Goodax Barre ayaa sheegay in imtixaanka sannadkan uu dhici doono 11 ilaa 16-ka bisha May ee soo socota.

 

“Sannadkan imtixaanka waxaa u fadhisan doona 45 kun oo ardey, dhammaan gobollada dalka 11-16-ka bisha May ee soo socota, wasaaradda waxay soo gaba gabeysay maalintii shalay dhammaan wax kasta oo ku saabsana imtixaanka, ardeyda sannadkan ka baxeysa dugsiga sare waxay korodhay boqolkiiba 20-tan taasna waxaa ugu wacan nabadda’ayuu yiri wasiir Goodax.

 

“Dhamma an hay’addaha kale ee  dowladda waxaan ka rabnaa inay nagala qeyb qaatan ilaalinta imtixaanka sidii markii horaba noogala qeyb qaadan jireen, dowladda goboleedyada, maamulada iskuullada iyo waalidiinta waxaan ku boorinaya inay kaalintooda ka qaatan qabsoomida imtixaanka qaran”ayuu yiri Mudane Cabdulahi Goodax Barre.

 

Wasaaradda waxbarashadda xukumadda federaalka Soomaaliya ayaa dadaal ugu jirta sidii loo horumarin laha waxbarashada dalka iyo qabsoomida imtixaanka sannadkan.

Wasiirka waxbarashada XFS oo la kulmay wasiirada waxbarashada Jubbaland, Koonfur Galbeed Galmudug iyo Hirshabeele.

Wasiirka wasaaradda waxbarashadda hiddaha iyo tacliinta sare ee xukuumadda federaalka Soomaaliya Mudane Cabdulahi Goodax Barre ayaa magaalada Muqdisho kulan kula qaatay wasiirada  waxbarashada  maamul gobaleedyada jubbaland Koonfur galbeed Galmudug iyo Hirshabeelle.

Kulanka ayaa waxaa goob joog ka ahaa wasiir ku xigeenka wasaaradda waxbarashadda Feysal Cumar Guuleed iyo agaasimaha guud ee wasaaradda waxbarashada Axmed Xasan Yuusuf.

Arrimaha kulankan diirada lagu saaray ayaa waxaa ka mid ah horumarinta waxbarashada dalka, xoojinta xariirka ka dhaxeya wasaaradda waxbarashada iyo wasaaraddaha dowlad gobaleedyada.

Wasiirada maamul Gobaleedyada jubbaland Koonfur galbeed Galmudug iyo Hirshabeelle ayaa soo dhaweyay horumarinta waxbarashada dalka iyo in leeska kaashto si caruurta Soomaaliyeed ay u helaan waxbarasho dhameystiran.

Wasiirka waxbarashada Xukuumadda Federaalka Soomaaliya Mudane Cabdulahi Goodax Barre  ayaa sheegay in  kulanka ay diirada ku saareen manhajka, siyaasadda iyo sharciga Waxbarashada,dhismaha xarumaha  iyo tababarka macalimiinta.

Wasaaradda waxbarashada xukuumadda federaalka Soomaaliya ayaa dadaal ugu jirta sidii loo horumarin lahaa waxbarashada dalka.

Wasiirka waxbarashada XFS oo madaxda Jaamacaddaha Muqdisho kala hadlay tayeynta waxbarashada

Wasiirka waxbarashadda hiddaha iyo tacliinta sare ee xukuumadda federaalka Soomaaliya Mudane Cabdullahi Goodax Barre ayaa maanta magaalada Muqdisho kulan kula qaatay madaxda jaamacadda ku yaalla gobolka Banaadir.

Kulanka ayaa looga hadlay sidii wada jir looga qeyb qaadan lahaa horumarinta waxbarashada dalka islamarkana loo abuuri laha wada shaqeyn dhab ah oo dhaxamrta bahda waxbarashada iyo wasaaradda.

Wasiiru dowlaha wasaaradda waxbarashada Cabdiraxmaan Maxamuud Cabdulle, wasiir kuxigenka wasaaradda waxbarashadda  Feysal Cumar Guuleed, iyo agaasimaha waaxda tacliinta sare Ismaaciil Yuusuf Cismaan, ayaa goob joog ka ahaa kulanka.

Mudane Cabdullahi Goodax Barre ayaa sidoo kale madaxda jaamacaddaha sidii la isaga ilaalin lahaa in shahaado la siiyo qof aan xaq u lahayn, lagana fogaado in muddo ka yar afar sano in shahaado lagu bixiyo ama qof aan dugsi sare ka soo bixin loo aqbalo in uu jaamacad galo.

“Maanta waxaan magaalada Muqdisho kulan kula qaatay madaxda jaamacaddaha ku yaalla gobolka Banaadir,kulankeenna waxaan diirada ku saarnay sidii wada jir looga qeyb qaadan lahaa horumarinta waxbarashada dalka islamarkana loo abuuri laha wada shaqeyn dhab ah oo dhaxamrta bahda waxbarashada iyo wasaaradda,”ayuu yiri wasiirka waxbarashada mudane Cabdullahi Goodax Barre

“Arrimaha kale ee aan ka wada hadalnay waxaa ka mid ah sidii la isaga ilaalin lahaa in shahaado la siiyo qof aan xaq u lahayn, lagana fogaado in muddo ka yar afar sano in shahaado lagu bixiyo ama qof aan dugsi sare ka soo bixin loo aqbalo in uu jaamacad galo”ayuu intaasi ku daray wasiir Goodax.

Wasaaradda waxbarashada hiddaha iyo tacliinta sare ee xukuumadda federaalka ee Soomaaliya iyadoo kaashaneysa bahda waxbarashada waxaa markasta ka go’an tayeynta waxbarashada iyo in xirfado loo abuuro dhalinyarada Soomaaliyeed ay looga baxo shaqa la’aanta.

Wasiiru dowlaha wasaaradda waxbarashada XFS.yaa kormeer ku sameyay xarunta diyaarinta xogaha ardayda imtixaanaadka qaranka ee 2018 2019

Wasiiru dowlaha wasaaradda waxbarashada Hiddaha iyo tacliinta sare ee Xukuumadda Federaalka Soomaaliya mudane Cabdi raxmaan maxamuud cabdulle Jaabir ayaa maanata kormeer ku sameyay xarunta diyaarinta xogaha ardayda imtixaanaadka qaranka ee 2018 2019 kuwaasoo ku yaalla magaalada Muqdisho ee caasimadda dalka.
Wasiiru dowlaha ayaa waxaa kormeerka ku wehliyay Agaasimaha guud ee wasaaradda waxbarashada mudane Axmed xasan yuusuf iyo xubno kale oo ka tirsan wasaaradda waxbarashada.
Wasiiru doowlaha wasaarada waxbarashada XFS, Soomaaliya Cabdi raxmaan maxamuud Cabdulle Jaabir ayaa sheegay in markasta uu waa jib uu ka saranyahay hurumarinta waxbarashada dalka.
,,Maanta waxaan kormeer ku samaayay xarunta diyaarinta ardayda imtixaanaadka qaranka ee 2019 2018 kuwaasoo ku yaalla magaalada Muqdisho ee caasimadda dalka.
Hadafka kormeerkan waxaa ugu muhiimsan hubinta nidaamka cusub oo loo qaadi doono imtixaanka sannadka kaasoo ka turjuma waqtiga hada la jooga ee casriga waqtigii hore waxaan isticmali jirnay in imtixaanadka loo qaado qaab aan aheyn midka aan hadda soo kordhinay sanadkaan waxaan u diyaara garoobeynaa in aan diiwaan galino 37000 ( Sodon iyo Todobo kun oo ardey) oo jooga qeybaha uu dalku ka kooban yahay waxaa noo qorsheysan imtixaanka uu dhaco isbuuca koowaad ee bisha shanaad ee sannadkan.
Waxaan rajeyneynaa in sannadkan uu ka duwanaan doono sanadkii hore waayo tirade ardayda aad bey u badan tahay sababta keen tana waa nidaamka iyo qorshaha aan u dajinay oo bulshada Soomaaliyeed kalsooni badan ay ku qabaan.
Kormeerkan waxaa igu wehelinayay agaasimaha guud ee wasaaradda waxbarashada Axmed Xasan Yuusuf waxaan sigaar ah ugu mahad celinayaa dhamaan shaqaalaha wasaaradda waxbarashada Hiddaha iyo tacliinta sare ee xukuumadda federaalka Soomaaliya oo markasta u tagan u adeegida shacabka Soomaaliyeed.

Wasiirka waxbarashada XFS oo Cape Town kula kulmay jaaliyadda Soomaaliyeed.

Wasiirka waxbarashada hiddaha iyo taclinta sare ee xukumadda federaalka Soomaaliya Mudane Cabdulahi Goodax Barre iyo wafdi uu hogaaminayo oo ku sugan dalka Koonfur Afrika ayaa kulan la qaatay jaaliyadda Soomaaliyeed ee ku nool magaalada Cape Town.

Kulankan ayaa waxaa inta badan goob joog ka ahaa qeybaha kala duwan ee bulshada Soomaaliyeed sida ganacsato,  aqoonyahano, siyaasiyiin, ardayda iyo Culumaaudiinka.

Guddoomiyaha jaamacadda Ummadda Maxamed Axmed Jimcaale, danjiraha dowladda Soomaaliya u fadhiya Koonfur Afrika Jamaal Maxamed Barrow iyo xubno ka tirsan wasaaradda waxbarashada ayaa goob joog ka ahaa kulanka.

Mudane Cabdulahi Goodax Barre ayaa xubnaha ka qeyb galay kulanka u sheegay in  dalka Koonfur Afrika u yimid  sidii iskaashi dhanka horumarinta waxbarashada u yeelan lahayeen dalalka Soomaaliya iyo Koonfur Afrika.

Wasiirka waxbarashada hiddaha iyo tacliinta sare ee Soomaaliya Mudane Cabdulahi Goodax Barre ayaa sheegay in dowladda Koonfur Afrika ay kala hadli doonaan  sidii looga hortagi lahaa dhibaatada loo geysto  dadka Soomaliyeed ee ku nool dalka Koonfur Afrika iyo sidii arday Soomaaliyeed ee dalkan ku sugan aqoontooda kor loogu qaadi lahaa.

Mudane Cabdulahi Goodax Barre ayaa inta uu joogo dalka Koonfur Afrika lagu wadaa inuu kulamo kala duwan la qaato madaxda dalkan.

 

Wasiirka Waxbarashadda Xukuumadda oo Booqday Xarunta Farsamada Gacanta lagu barto ee magaaladda Cape town

Wasiirka Wasaaradda Waxbarashada Xukuumadda Federaalka Soomaaliya Mudane Cabdullaahi Goodax Barre oo wehliyo Gudoomiyaha Jaamacadda Ummadda Soomaaliyeed  ayaa maanta booqday College of Cape Town oo ah Xarun lagu barto Xirfadaha Farsamada Gacanta.

Wasiirka ayaa Xaruntaasi kulan kula qatay  Madaxda College-ka, waxa ayna kawa hadleen  Habka ay u shaqeeyo College of Cape Town iyo Qalabka ay wax ku baraan Dhalinyadda barta Xirfada gacanta.

Maanta waxaan kormeer ku tagay College of Cape Town oo ah mid lagu barto xirafadda farsamada gacanta , waxaan kula kulmay madaxda College-kan wuxuu faah faahin iga siiyay habka ay u shaqeeyaan iyo qalabka ay wax ku baran dhalinyarada barta xirfaddan.
Waxaan ka codsanay inay gacan naga siiyaan sidii dalkeenna looga hirgelin lahaa xarumo casri ah oo lagu barto farsamada gacanta si dhalinyarada Soomaaliyeed uga faa’ideystan.
Wasaaradda waxbarashadda hiddaha iyo tacliinta sare waxaa ka go’an hirgelinta dugsiga farsamada gacanta taasoo sahleysa in shaqo abuur ay helan dhalinyarada Soomaaliyeed.

Wasiirka Wasaaradda Waxbarashada Xukuumadda Federaalka Soomaaliya ayaa ka codsaday Maamulka Xaruntaasi in Gacan ay ka siiyo Siddii Soomaaliya looga hirgelin lagaa Xarumo Casri ah oo lagu barto Farsamada gacanta, si dhalinyaradda Soomaaliyeed ay uga faa’iideystaan.

Wasiirka waxbarashada Xukuumadda Federaalka Soomaaliya ayaa sheegay in Wasaaradda Waxbarashadda ay ka go’an tahay in dalka laga hirgeliyo Dugsiga farsamada gacanta,si loo soo saaro dad xirfadlayaal.

Wasiiru Dowlaha Wasaaradda waxbarashada oo maamulka Gobalka banaadir kala hadlay horumarinta waxbarashada Gobalka banaadir

Wasiiru dowlaha Wasaaradda waxbarashada Xukuumadda Federaalka Soomaaliya mudane Cabdi raxmaan Maxamuud Cabdulle Jaabair ayaa manta kulan laqaatay Xarunta wasaaradda waxbarashada Gudoomiye ku xigeenka arimaha bulshada Gobalka Banaadir  Basma Caamir Axmed,Agaasimaha waxbarashada Gobalka Banaadir cabdi naasir rooble iyo Gudoomiyaha horumarinta bilicda Muqdisho Cabdi casiis Goodax.

Kulanka ayaa intii uu socday looga hadlay iskaashiga horumarinta Waxbarashada dugsiyada Gobalka Banaadir iyo sidii gobalka banaadir iyo wasaaradda waxbarashada ay ugu wada shaqeyn lahaayeen .

Gudoomiye ku xigeenka arimaha bulshada gobalka banaadir Marwo Basmo Caamir ayaa soo jeedisay in lagawada qeyb qaato sidii waxbarashada dugsiyada gobalka banadir loo hormarin lahaa iyo in Gobalka banaadir lagu soo wareejiyo dugsiyada Gobalka Banaadir.

Wasiiru dowlaha wasaarada waxabarashada Cabdi raxmaan Maxamuud Cabdulle [Jaabir ayaa waxa uu sheegay in muhiimad gaar ah ay u leedahay bulshada Soomaaliyaad in sare loo qaado waxbarashada dalka gaar ahaan dugsiyada Gobalka banaadir.

Maanta waxaan xafiiskeyga magaalada Muqdisho ku qaabilay guddoomiye ku xigeenka arrimaha bulshada gobolka Banaadir Basmo Caamir Axmed iyo guddoomiyaha horumarinta bilicda gobolka Banaadir Cabdicasiis Goodax BarreAgaasimaha waxbarashada Gobalka banaadir cabdi naasir rooble abuukar.

Waxaan ka wada hadalnay  sidii wasaraada waxbarashada iyo maamulka gobolka Banaadir ay iskaga kaashan lahaayeen horumarinta waxbarashada dugsiyadda gobolka Banaadir waxakale oo aan kawada hadalnay sidii maamulka gobalka banaadir ay wasaaradda waxbarashada ay ugu wareen jin laheyda dugsiyada Gobalka banaadir.

Wasaaradda waxbarashada xukuumadda federaalka Soomaaliya waxaa mar walba ka go’an inay ku dadaasho horumarinta  waxbarashada dalka si loo helo dhalinyaro leh xirfad ay ku shaqeystan.

Wasiirka waxbarashada xukuuumadda Soomaaliya ayaa shahaadooyin guddoonsiiyay maxaabiista bartay bartay Koombitarka iyo saxaafadda

Wasiirka waxbarashada Hiddaha iyo Tacliinta sare ee xukuumadda Soomaaliya  ayaa maanta magaalada Muqdisho uga qeyb galay munaasabad  38 maxbuus oo  dhameysatay dugsiga hose dhexe oo lagu qabtay xabsiga dhexe ee Xamar.

Munaasabada ayaa waxaa joob joog ka ahaa  taliyaha ciidamada asluubta Soomaaliyeed Bashiir Maxamed Jaamac, saraakiil ciidan iyo marti sharaf kale oo lagu casumay .

Maxaabiistan ayaa  bartay  koombitarka  iyo saxaafadda waxa ayna soo bandhigeen aqoontooda ku aadan habka wax loo baray iyo bugaag ay diyaariyeen intii ay xabsiga ku jireen.

Wasiirka waxbarashada Xukuumadda Federaalka Soomaaliya Mudane Cabdullaahi Goodax Bare ayaa munaasabadda ka sheegay  siyaasadda iyo aragtida  la xiriirto xabsiyada ee dowladda.

“Xabsiga iyo maxbuuska xariirka ka dhaxeya maha xiir aar goosi ah mana ahan xiir qofka lagu ciqaabayo  balse waxa uu yahay xiriir qofka bulshadiisa danbi ka galay in lagu saxo la rabo xabsigu maaha meel la isaga  aarsado ee waa meesha kaliya ee qofku marka uu bulshadiisa uu danbiga ka galay dib ugu soo laabto uu u noqdo qofka bulshada ugu fiicaan , waxana marqaati ka ah maanta munaasabada ay  ku qalin jabinayaa 38 maxbuus oo bartay maa dooyinka koombiitarka iyo saxaafadda taasina waa qeyb kamid ah horumarka dowladda ay gaartay”ayuu yiri wasiirka waxbarashada Soomaaliya.

“Ciidanka Asluubta Soomaaliyeed dhamaan tood meelkasta oo ay joogaan iyo Hogaankooda wanaagsan oo soo nooleysiiyay kana shaqeysiiyay aragtida xukuumadda jamhuuriyada Federaalka Soomaaliya waa mid xasuus gaar ah mudan”ayuu intaasi raaciyay wasiir Goodax.

Mudane Cabdulahi Goodax Barre ayaa sheegay in ka wasaarad ahaan  faraxsad u tahay in maxaabista Soomaaliyeed ay wax bartan.

“Ka wasaarad ahaa sigaar ah bey noo taabaneysaa in wax la baro maxaabista Soomaaliyeed danbi kasta ha ku xirnaadaane waxbarashdu waa mida kaliya ee qofku horumar ku gaari karo”ayuu yiri mudane Goodax.

Taliyaha ciidaanka Asluubta Soomaaliyeed Sareeye Guud Bashiir maxamed Jaamac  ayaa sheegay inay ka go’an tahay sidii maxaabiista ay u noqon lahayeen dad wax bartay.

Wasiirka Waxbarashada XFS oo dhagax dhigay iskuulka sare degmada Howlwadaag, kuwa kalana xariga ka jaray

Wasiirka waxabasrashada Xukuumadda Soomaaliya mudane Cabdullaahi Goodax Barte ayaa maanta dagmada Hol-wadaag ee gobalka Banaadir ka dhagax dhigay dugsiga sare oo ay wax ku baran doonaan ardayada degan howlwadaag.

Sidoo kale wasiirka Waxbarashada mudane Cabdulahi Goodax Barre  ayaa ka qeyb galay munaasabadda xariga looga jarayay  iskuulladda hoose dhexe  ee howlwadaag iyo Xassan  Qariidi, waxana ku wehlinaya wasiirka qorsheynta iyo xiriirka Calaamiga ah ee Soomaaliya, Amb Jamaal Maxamed Xasan, madaxa midowga yurub pinji Gardiyola ,madax ka socotay hay,adda Adra iyo marti sharaf kale oo lagu casuumay

Wasiirka qorsheynta xukuumadda Soomaaliya jamaal Maxamed Xasan oo munaasabadda ka hadlay ayaa shegay in XFS,ay mar walba diyaar u tahay horumarinta waxbarashada dalka iyo in dib loo soo celiyo dugsiyadii burburka uu soo gaaray.

Madaxa midowga Yurub  Pinji Gardiyola ayaa sheegay in ay qeyb ay ka qaadan doonaan horumarinta waxbarashada Soomaaliya waxana u mahad celiyaya xukumadda Soomaaliya oo uu shegay in ay ku dadaashay kor u qaadista waxbarshada Soomaaliya.

Wasiirka waxbarashda Xukuumadda Soomaaliya Cabdullaahi Goodax Bare ayaa shegay in ahmiyada koobaad la siinayo horumarinta waxbarshada dalka islamarkana loo baahan yahay in lasoo saaro macalimiin tayo leh si ardayda Soomaaliyeed ay heer u gaaraan .

“Sida aad ka war qabtaan maanta waxa aan isugu nimid in aan u dabaal dagno dayactirka labada iskuul sidoo kale muhiimad gaar ah bey noo leedahay dhagax dhiga  dugsi sare oo ay yeelato dagmada Howlwadaag  sida aan ognahay ardayda inta badan waxa ay aadan dagmooyin kale si ay u helaan dugsi sare  maanta waxaad nasiib u yeelateen hadii aad tihiin dagmada holwadaag in aad heshaan dugsi sare”ayuu yiri wasiirka waxbarashada Soomaaliya.

Wasaaradda waxbarashada xukuumadda federaalka Soomaaliya ayaa dadaal ugu jirta in gacanta dowladda dib loogu soo celiyo iskuuladii dowladda islamarkana kor loo qaado aqoonta macalimiinta iyo tayeynta waxbarashada

Wasaaradda waxbarashada XFS,ayaa tababar ugu furtay Magaalada muqdisho 70 boqol oo maamule.

Wasaaradda waxabarashada Hiddaha iyo Tacliinta sare ee Xukuumadda Soomaaliya ayaa maanta  magaalada Muqdisho tababar uga furtay in ka badan 700  oo macalin oo wax ka dhiga iskuullada ku yaalla gobolka Banaadir.

Tabarkaan oo socon doono muddo todobo maalmood ah ayaa lagu baran  doono  xog aruurinta sanadlaha ah ee iskuullada hoose dhxe sare ee gobolka Banaadir.

Todobada maalmood ee uu socdo tababarkan ayaa maalin walba ka qeyb galaya 100 macalin  waxana tababarkan  bixinaya xafiiska xog aruurinta iyo tira koobka wasaaradda waxbarashada.

Agaasimaha waaxda qorsheyta Khadiijo Cabdalle jimcaale ayaa sheegtay in tababarkaan uu ku saleysan yahay xog aruurinta sanadlaha ah ee iskuullada gobalka Banaadir iyo sidii leysaga kaashan lahaa sidii macluumad dhab ah  looga diyaarin lahaaa sida ay u socoto waxbarashada iskuullada gobalka Banaadir.